AMMA പുറത്താക്കിയതുകൊണ്ട് മാത്രം കാര്യമില്ല, അയാളുടെ ഒപ്പം എല്ലാവരും അഭിനയിക്കും: ഭാഗ്യലക്ഷ്മി

നടന്‍ ഷൈന്‍ ടോം ചാക്കോയ്‌ക്കെതിരെ നടി വിന്‍ സി അലോഷ്യസ് പരാതി നൽകിയ സംഭവത്തിൽ പ്രതികരണവുമായി ഭാഗ്യലക്ഷ്‌മി. എ എം എം എ എന്ന സംഘടന ഒരാളെ പുറത്താക്കിയതുകൊണ്ട് മാത്രം കാര്യമായില്ല. പുറത്താക്കുക എന്നത് വളരെ എളുപ്പം ചെയ്യാവുന്ന കാര്യമാണെന്ന് ഭാഗ്യലക്ഷ്മി പറഞ്ഞു. സിനിമയിലുള്ളവർ ഒന്നിച്ച് നിന്നൊരു തീരുമാനം എടുക്കണം. ലഹരി ഉപയോഗിച്ചുകൊണ്ട് സെറ്റിൽ വരുന്നവരെ സഹകരിപ്പിക്കില്ല എന്ന് സംഘടനകൾ തീരുമാനിക്കണമെന്നും ഭാഗ്യലക്ഷ്മി പറഞ്ഞു. റിപ്പോർട്ടറിനോട് പ്രതികരിക്കുകയായിരുന്നു ഭാഗ്യലക്ഷ്മി.

'ഒരു പെൺകുട്ടിയ്ക്കെങ്കിലും ഇത് തുറന്നു പറയാനുള്ള ധൈര്യമുണ്ടായല്ലോ എന്നാണ് ആദ്യം തോന്നിയത്. ഒപ്പം ഒരുപാട് ബഹുമാനവും തോന്നി കാരണം തന്റെ നിലപാട് വ്യക്തമാക്കുമ്പോള്‍

തനിക്ക് നഷ്ടമാകുന്ന അവസരങ്ങൾ, നാളെ സംഭവിക്കാവുന്ന പല രീതിയിലുള്ള ബുദ്ധിമുട്ടുകൾ

തുടങ്ങിയവയൊന്നും വകവെക്കാതെ എനിക്ക് ഇങ്ങനെ സംഭവിച്ചു എന്നൊരു പെൺകുട്ടി പറയണമെങ്കിൽ അത്ര മാത്രം ആത്മവിശ്വാസമുള്ള കുട്ടി ആയിരിക്കണം'.

'എഎംഎംഎ എന്ന സംഘടന ഒരാളെ പുറത്താക്കിയതുകൊണ്ട് മാത്രം കാര്യമായില്ല. പുറത്താക്കുക എന്നത് വളരെ എളുപ്പം ചെയ്യാവുന്ന കാര്യമാണ്. സിനിമയിലുള്ളവർ ഒന്നിച്ച് നിന്നൊരു തീരുമാനം എടുക്കണം. ലഹരി ഉപയോഗിച്ചുകൊണ്ട് സെറ്റിൽ വരുന്നവരെ സഹകരിപ്പിക്കില്ല എന്ന് സംഘടനകൾ തീരുമാനിക്കണം. ഈ വ്യക്തിയുള്‍പ്പടെ വലിയ താരങ്ങൾക്കൊപ്പം അഭിനയിക്കുന്നവരാണ്. പല വിഷയങ്ങളിൽ അവളോടൊപ്പം എന്നും അവനോടൊപ്പം എന്ന് പറയുന്നവരെയാണ് നമ്മൾ കണ്ടുകൊണ്ടിരിക്കുന്നത്. അയാളെ പുറത്താക്കിയാലും അയാളുടെ ഒപ്പം എല്ലാവരും അഭിനയിക്കും. അതുകൊണ്ട് അയാൾക്ക് എന്ത് നഷ്ടമാണ് ഉണ്ടാകുന്നത് ? അവിടെയും നഷ്ടമുണ്ടാകുന്നത് ഇത് പുറത്തു പറഞ്ഞ നടിയ്ക്കാണ്', ഭാഗ്യലക്ഷ്മി പറഞ്ഞു.

ലഹരി ഉപയോഗിക്കുന്നവര്‍ക്കൊപ്പം ഇനി സിനിമ ചെയ്യില്ലെന്നും ലഹരി ഉപയോഗിച്ച ഒരു നടനില്‍ നിന്നും മോശം അനുഭവം ഉണ്ടായതിനാലാണ് തീരുമാനമെന്നുമുള്ള വിന്‍ സിയുടെ വെളിപ്പെടുത്തല്‍ ചര്‍ച്ചയായിരുന്നു. അന്ന് നടന്‍റെ പേര് വിൻ സി വെളിപ്പെടുത്തിയിരുന്നില്ല. പിന്നാലെ ഇപ്പോൾ ഷൈൻ ടോം ചാക്കോയ്ക്കെതിരെ വിന്‍ സി ഫിലിം ചേംബറിന് പരാതി നൽകുകയായിരുന്നു. 'സൂത്രവാക്യം' എന്ന സിനിമയുടെ ലൊക്കേഷനില്‍ വെച്ച് ഷെെൻ ടോം ചാക്കോയില്‍ നിന്നും മോശം അനുഭവം നേരിടേണ്ടി വന്നുവെന്ന് ചൂണ്ടിക്കാട്ടിയാണ് വിൻ സി ഫിലിം ചേംബറിന് പരാതി നൽകിയത്. സിനിമയുടെ ആഭ്യന്തര പരാതി കമ്മിറ്റിക്കും പരാതി നല്‍കിയിട്ടുണ്ട്.

Content Highlights: Bhagyalakshmi comments on Vincy Aloshious complaint against Shine Tom Chacko